Tidak n tejma3t
Semmaɣ-as i wedlis-a “Tidak n tejmaεt” acku di tejmaεt nettawi-tent-id yakk temkudin-a. D tajmaɛt i d aɣerbaz n taddart. Yal yiwen ileqqeḍ deg-s tamusni, iwellihen… Tajmaεt di tmurt n Leqbayel d amkan anda ttɣimin yergazen d yilemẓiyen n taddart. Tajmaεt tεemmer tameddit n wass, mi fukken yimdanen lecɣal-nsen. Deg uzal d imɣaren kan i tt-iεemren. Mi i d-mlalen dinna, yal wa d acu yesseftuy. D timεayin-nni i d-leqdeɣ sya d sya, rriɣ-tent-id deg udlis-a. Agraw n taddart d tuddsa i yaɣ-d-ǧǧan yimezwura. Yebna ɣef tugdut, aciwer d leqwanen i d-sbeddayen imezdaɣ-is ; yis-s i nesselḥay akk lecɣal n taddart. Ayen yessewhamen di tuddsa-ya, ulac win yellan s nnig wayeḍ. Awal ittsiḥ-d i yal amdan akken yebɣu yili wemkan-is di tmetti, ini-d, ad d-iniɣ, sswab ad d yufrar. Segmi i qqaren sswab yettaf-it umeqqran, yettaf-it umeẓyan. Tajmaεt neɣ agraw uran-d fell-as aṭas n yimusnawen, am Hanoteau akked Letourneux, Boulifa, Feraoun, Adli... Tajmaɛt d amkan anda ferrun ccḥani d lehmum, tteksen tiɛdawit gar yemdanen, beṭṭun akal gar watmaten, zeṭṭen lxir, gar wat taddart...
--------------------------------
Ahmed Aït Bachir (1953-2026). D amaru, d ameɣnas ɣef teqbaylit d tugdut. Yessuqel-d “Histoire de ma vie” n Faḍma At Mensuṛ Ɛemruc, “Tudert-iw”deg useggas n 2024 ar Tezrigin Koukou. “Tidak n tejmɛt” d adlis-is wis sin.